Seit Oktober offiziell
be i eure O‘laufschdell
fir faschd älles, was älter wärra betrifft
seither be i ondrwägs, in Person ond au in Schrift
Hellau!
I lern eich kenna, hör au zua
ond glaubat, ois lässt mir koi Ruah:
no emmr senn manche ganz alloi
i fend, des muass jo gar et sei -
mir miassat zsammarucka
et bloss aus m Fenschdr gugga
ond firanander ebbes schaffa
(damit au mir et selbschd erschlaffat)
Hellau!
Älles wa mr sich gegaseitig duad
des gibt viel Freid ond au an Muat
denne dia helfat, denne die s brauchat
fir sell die no fit send ond die schier nemme schnaufat..
Hellau!
I ko jo macha was i will
ond han scho au manch heeres Ziel
doch ohne euch, des ischd wohl klar
be i dr Seniora-Bauftragte-Narr!
Hellau!
Zom Beispiel har i ällmohls wieder:
Mit denne Klei/Großengstinger oder Kohlstetter
seng i gwieass koine scheene Liader!
Liabe Menscha, ob groß ob klei:
Lassat doch den Humbug sei
was frieher war, des isch mol gwä
Frieda ond Oivernehmlichkeit...
I woiss, s` ischd manchmol zäh...
Hellau!
Doch lohnt sichs, guggat mir drieber naus
d Welt duad verruckt, s ischd a Graus
aber mir Älbler, mir kennat s besser
mir lieafrat neamds na ans Messer!
Ob älter, alt, ob jonger Mensch
sei friedlich zu jedem den de kennschd
ond lern kenna, wer dir no fremd
vielleicht hoschd sogar ibrig, a passends Hemd
ond ruckzuck hoschd an nuia Kumpel
wenn du selbst dareinst no mol humpelschd
ischd er fir de do – egal ob Groß, ob Kleiengstinger oder
Kohlstetter Mo (ich verzichte auf s gendern.)
Hellau!
Veehrte Leit! Et dass ihr moinat
i will euch belehra
oder zom äbbas komischem bekehra
i seh so viel kreatives Potential
und des mit euch zom Läba bringa, find i genial
Hellau!
Drom lebat freelich ond au xsond
wenn r henn, gangat mit ma Hond
der euch an d´frische Luft rauszerrt
bewegat euch, so wie sich s gheert
Bewega isch läba- ond des ischds wert!
Hellau!
Wenn Zuzogne des läsat ond s et kapierat
hockat euch mit denne zsamma und sezierat
wa meine Vers zom „bedeuten haben“
ond ibersetzat, beim gemütlichen Weine
meine Reime.
Viel Spass dabei und Hellau!
Eure S.Kunz-Wernicke
